Komuna e Obiliqit, përmes Drejtorisë për Kulturë, Rini dhe Sport, ka shënuar sot për herë të parë Ditët Evropiane të Trashëgimisë, me një aktivitet të organizuar në Shtëpinë e Kulturës në Milloshevë.
Në këtë aktivitet ishte i pranishëm edhe Kryetari i Komunës së Obiliqit, Halil Thaçi, i cili iu bashkua nxënësve dhe pjesëmarrësve në aktivitetet e zhvilluara me këtë rast.
Në kuadër të programit, nxënësit morën pjesë në punëtorinë me qeramikë, ku patën mundësi të shprehin kreativitetin e tyre përmes punimeve të ndryshme. Po ashtu, u prezantua ekspozita e vlerave të trashëgimisë evropiane, përmes fotografive dhe materialeve që pasqyrojnë historinë, kulturën dhe traditat.
Aktiviteti synoi të afrojë veçanërisht të rinjtë me vlerat e trashëgimisë kulturore dhe të rrisë ndërgjegjësimin për rëndësinë e ruajtjes, promovimit dhe përcjelljes së saj te brezat e ardhshëm.
