Sqarim për opinionin
Dorëheqja nga kandidatura është akt personal dhe i lirë, që mbetet i respektuar nga secili prej nesh. Por për hir të së vërtetës duhet theksuar se sipas nenit 85 të Statutit të Lëvizjes VETËVENDOSJE!, votohet lista – jo numrat dhe jo “bartësi i listës”.
Në mbledhjen e Kryesisë së Qendrës në Klinë, me 11 anëtarë me të drejtë vote, lista e propozuar u votua dhe rezultati ishte:
• 5 vota pro
• 4 vota kundër
• 2 abstenime
Pra, lista u miratua me mua si kryesuese të kësaj liste.
Vendimi për kryesuesin e listës është marrë më herët dhe i është bërë me dije znj. Alketa Mehmetaj më 18.07.2025, gjatë një takimi të kërkuar prej saj me anëtaren e kryesisë Qendrore të Lëvizjes VETËVENDOSJE! Atë ditë iu është dhënë përgjigja e qartë se mbi bazë të meritokracisë dhe kontributit konkret, e para e listës do të jetë Kryetarja e Qendrës, znj. Teuta Mulaj.
Ata që përgatitën skenarë jashtë zyrës dhe u fshehën pas “parimeve”, në fakt shkelën hapur Statutin.
Dorëheqja është e drejtë e secilit kandidat, por nuk është e drejtë që ajo të shoqërohet me akuza të pavërteta, të cilat nuk i shërbejnë as organizatës sonë, as qytetarëve tanë.
Unë mbetem e përkushtuar të punoj me secilin aktivist dhe qytetar të Klinës në rrugën tonë të përbashkët për ndryshim.
E theksoj se në Lëvizjen VETËVENDOSJE! gjithçka vlerësohet mbi bazën e kontributit. Asgjë nuk fitohet me shantazhe mediatike apo me përpjekje për imponim me dhunë.
Prandaj unë jam në VV – aty ku ndihem e vlerësuar për punën dhe përkushtimin tim.
Me respekt,
Teuta Mulaj
