Pas vendosjes së gurthemelit të çerdhes së re në Roganë, vazhduam për vizitë në një projekt tjetër të rëndësishëm në Komunën e Kamenicës i cili ka filluar punimet në nëntor të vitit të kaluar: Stadiumi i parë i Atletikës në vend.
Po investojmë vazhdimisht në ngritjen e infrastrukturës së posaçme sportive në vend. Vlera e projektit të ndërtimit të Stadiumit të Atletikës është 3,5 milionë euro, me një afat realizimi prej 36 muajsh. Punimet po ecin drejt e mbarë si synimi i qeverisjes sonë për sportin e atletët, e me ritëm të shpejtë ashtu siç është dhe atletika vetë.
Për një stadium sipas standardeve ndërkombëtare, sipërfaqja ndërtimore e projektit është prej 870 metra katrorë, me 8 shtigje për vrapim prej 400 metrash, shteg ndihmës prej 100 metrash jashtë fushës së atletikës e me mbi 1000 ulëse, gjersa do të ketë dhe hapësirën e përshtatshme të parkingut prej 2908 metrash katrorë.
Investimet në infrastrukturën sportive do të vazhdojnë me qeverisjen tonë. Për sportin, për atletikën, për stadiumin që e meriton Kamenica dhe i gjithë vendi.
