Shkruan : Arbresha Meha
Kosova është ndërtuar shpesh “në dy fronte”: këtu – dhe jashtë. Në këtë histori, mërgata nuk ka qenë vetëm dërguese parash, por mbajtëse e institucioneve, zë politik ndërkombëtar dhe motor zhvillimi.
Kur u mbyllën hapësirat e lirisë dhe u goditën institucionet, mërgata u bë burimi kryesor i qëndrueshmërisë. Remitencat mbanin familjet në këmbë dhe u bënë oksigjeni ekonomik. Një dorë të tillë e ka ndier secila familje — e ka ndier edhe familja ime, dhe unë personalisht: si studente në atë kohë, por edhe më vonë si mësimdhënëse, kur në shumë raste vazhdimësia e punës sonë mbështeteshin nga kontributi i mërgatës. Përmes kontributeve si “3%”, diaspora ndihmoi në financimin e arsimit dhe shëndetësisë paralele dhe të strukturave të organizimit të asaj kohe.
Edhe në këto zgjedhje, mërgata u dëshmua si një zë i fuqishëm: në mbrojtje të dinjitetit dhe të ardhmes. Sepse Kosova nuk është vetëm një vend në hartë — është përgjegjësi e përbashkët. Dhe ky zë mbetet forcë për një Kosovë më të fortë, më të drejtë dhe më të zhvilluar.
Prof. Asoc. Dr. Arbresha Meha
