Më 25 mars 1999, Serbia e kuptoi që humbja e saj ishte afër, se lufta për liri do të triumfonte dhe plani për zhdukjen e shfarosjen e shqiptarëve në Kosovë, do të dështonte. Një ditë pas fillimit të bombardimeve të NATO-s për të ndalur një gjenocid në veprim siç ishte ai që po vinte në akt Millosheviqi me bashkëpunëtorët e tij, Serbia vendosi që pafuqinë e saj ta shfrynte mbi popullatën civile dhe dëshpërimisht të përshpejtojë ekzekutimin e operacionit gjenocidal “Patkoi”.
Në fshatrat Tërnje të Therandës, Goden dhe Fortesë të Gjakovës si dhe Brestoc e Celinë të Rahovecit, përkujtuam e nderuam martirët e dëshmorët e kombit të vrarë nga aparati shtetëror serb sot 26 vjet më parë. Vitet kalojnë por koha nuk i shëron plagët, derisa drejtësia ende nuk është vënë në vend.
Ne përkulemi me nderim e mirënjohje të thellë për të gjithë ata të cilët kontribuan për lirinë e çlirimin e popullit tonë dhe Kosovës. Gjaku i dëshmorëve është në themelet e Republikës dhe neve na mbetet përgjegjësia e rëndësishme e forcimit të shtetit tonë në mënyrë që brezave të ardhshëm kurrë më të mos iu bie që të vuajnë, ndjejnë dhembje dhe humbje çfarë i kaloi brezi ynë.
Lavdi të gjithë dëshmorëve e martirëve të kombit! Qoftë i përjetshëm kujtimi për të gjithë të rënët për atdhe!
