Të nderuar qytetarë, miq, familjarë dhe përkrahës,
Katër vite më parë, më dhatë besimin tuaj për të qenë zëri juaj në Kuvendin e Republikës së Kosovës. Ky besim nuk ishte vetëm një detyrë e dhënë, por një përgjegjësi e shenjtë që e kam mbajtur me përkushtim dhe vendosmëri, duke qëndruar gjithmonë pranë jush dhe për ju. Sot, me po të njëjtin përkushtim, kam kënaqësinë dhe nderin të shpall kandidaturën time për një mandat të ri si deputet nga radhët e Lëvizjes VETËVENDOSJE!, për të vazhduar rrugën dhe punën që kemi nisur së bashku.
Kjo kandidaturë nuk është vetëm një hap përpara, por një zotim për të fuqizuar drejtësinë, barazinë dhe zhvillimin – tri shtylla që përbëjnë vizionin tonë për një Kosovë më të drejtë dhe më të barabartë. Vlera të tilla janë thelbi i Lëvizjes VETËVENDOSJE!, lëvizjes që ka qenë gjithmonë zëri i njerëzve dhe themeli i shpresës për një të ardhme më të mirë.
Në këtë rrugë, kam qenë gjithmonë pranë jush, duke luftuar për të adresuar padrejtësitë dhe sfidat që ndikojnë drejtpërdrejt në jetën e përditshme të qytetarëve tanë – në Obiliq dhe në gjithë Kosovën. I njëjti përkushtim që më ka shoqëruar në këto katër vite do të vazhdojë të më udhëheqë në këtë angazhim të ri.
Për ju që më keni mbështetur, që më keni besuar dhe që më keni inkurajuar në çdo hap, ju falënderoj nga zemra. Ky besim është forca ime, energjia që më shtyn të punoj pa u ndalur.
Të gjithë në lëvizje, gjithë për Kosovën!
