Shkruan Adifete Shiti
Ju desht z. Rubin të shkonte në Hagë e t’ua tregonte Popullit ton vlerën e Bacës Adem Demaçi, se sa shumë ka kontribuar për këtë vend dhe sa pak ia kemi ditur vlerën ne. Te gjallë shpesh i fyejmë e i degradojmë, ndërsa vetëm pas vdekjes i kujtojmë me respekt.
Fatkeqësisht, ky është realiteti ynë. Adem Demaçi ishte shembulli më i gjallë i rezistencës, i përkushtimit ndaj atdheut dhe i sakrificës për lirinë. Ai nuk kërkoi pasuri apo pushtet, por vetëm drejtësi dhe liri për popullin e vet.
Në Hagë, në diplomaci e kudo në botë, është dashur e duhet të flitet për figurat si ai – jo vetëm për të treguar sakrificën, por edhe për të dëshmuar se liria dhe shteti i Kosovës kanë pasur gjithmonë themele morale, të mbështetura mbi njerëz që ia kushtuan jetën idealeve kombëtare.
Një Adem Demaçi i dytë është i vështirë të gjendet, sepse njerëz të tillë lindin rrallë. Detyra jonë është ta mbajmë gjallë veprën e tij, ta mësojmë tek brezat e rinj dhe secili nga ne, në mënyrën e vet, të punojë për interesat e shtetit me ndershmëri dhe pa u lëkundur nga idealet kombëtare.
Lavdi jetës dhe veprës së Bacës Adem Demaçi!
